बेटी : च्यार कवितावां

बेटी-1 बिजळी रो बिल भरण रा पिसा नीं हा । बाप रो ढिलो मूं देख’र बेटी आप री पेटी मांय सूं मुड़ेडा रिपिया ल्याई । ल्यो बापू फेर दे देइयो । *** बेटी-2      कदी किणी री बेटी अब बणी मां । बेटी रा दुख देख’र सिसकारो नाख बोली बेटी तो किणी रै जामै’ई ना । ***

बेटी-3 ब्याह पछै बेटी नै पी’र च्यार दिन ई छोड़ै कोनी जुवाई लार रो लार आज्यै’र मूंडो लटकार कैवै- म्हारी मा री आसंग कोनी म्हे सोचूं- छोरी तो पूरी सूरी पढ़ी ई कोनी अर डाक्टर कद पछै हुयगी ! *** बेटी-4 बेटी री मां नै सुख सूं सोवणो कठै ? क्यूंक जद बा बेटी ही जणां उण री मां सूती सूती चिमकती, जागती सारी सारी रात । ***